امتحان هام جدا فى اللغه العربية

امتحان لغة عربية عصرى جدااا



السؤال الأول: التعبير


اكتب ما لايقل عن 650 سطر فى أحد الموضوعات التالية
1- لم يجد الطفل غير الشارع ملجأ نظرا لحالة البلد الهباب..فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة

2- شهدت بلدنا الحبيبة نهضة فى مجال التشييد والبناء وخصوصا بعد وصول سعر الحديد إلى 6500 جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل فى حديد عز

3- بعد انتشار ظاهرة أكل لحم الكلاب والحمير..من وجهة نظرك كحمار تكلم عن هذه الظاهرة ومن المتسبب فيها بدون غلط..الورق متراقب
السؤال الثانى: القصة


من قصة ' وعهد الله ما انت داخل الانتخابات' .. اقرأ القطعة وأجب عن الآتى
ثم أتى إليه وضربه بالجزمة وقال: انت عايز تترشح فى الانتخابات يا....؟؟ دانت عايز معجزة..مش كفاية بتاكلوا لحمة ومستورين.. عايزين إيه تانى؟

ما هى اللحمة؟ أو على الأقل حدد أقرب معنى خيالى لها

مرادف معجزة فى اللغة ( تغيير وزارى – زيادة المرتبات – رغيف العيش) اختر يا مقلول البخت

لماذ ضربه الرجل بالجزمة وليس بالعصى مثلا؟؟
حلل بمزيد من التفصيل جملة ضربه بالجزمة ومدى توافقها مع جملة مصر بتتقدم بينا
السؤال الثالث القراءة
من موضوع ( الزعيم..والفنان.. والقدوة) اقرأ القطعة وأجب

وقد نفى الزعيم عادل إمام الإشاعات التى أكدت أنه مرشح لوزارة الثقافة.. وأكد أنه فنان فقط وليس سياسيا" الخبر حقيقى "كما أنه يرحب بالتوريث ومقتنع بكل سياسات الحكومة

فى رأيك هل يصلح عادل إمام لوزارة الثقافة أم لوزارة الصناعة

دخل كاتب هذه السطور مسرحية بودى جارد للزعيم رغم قرفه منه أساسا.. فى رأيك ما السبب فى دخوله؟

أكيد معزوم – طبيعى معزوم – وربنا معزوم.. اختر على أن تضع إيدك على المصحف وانت بتحلف للمراقب بتاع اللجنة
السؤال الرابع النصوص
أجب عن أحد النصين الآتيين
1- من نص ( ماشربتش من نيلها)..اقرأ ثم أجب
ماشربتش من نيلها.. جربت تغنى لها.. جربت فى عز ماتحزن تمشى ف شوارعها وتشكى لها

1 - بعد رغبة صاحبة النص فى أن تلد ابنتها فى أمريكا لتحصل على الجنسية الأمريكية..اختر..ما المقصود بنيلها فى النص؟

المسيسبى - الأمازون – يونج يانج

2- هذا النص من نصوص الحزب الوطنى والدليل وجود اسم مهم من قيادات الحزب فى النص.استخرج الاسم..وبوسه ورجَّعُه مكانه

3- أكمل الأبيات إلى آخر كحكة فى الكليب


4- قوبل النص بانتقادات بسبب بعده عن الواقع..وضح من النص ما يتفق مع القول المأثور اطبخى ياجارية .. كلف يا سيدى

من نص (حين ميسرة)..أجب عن الآتى

1- اذكر اسم مصيبة واحدة محصلتش فى النص الأسود ده

2- وضح عبقرية أحمد بدير الإرهابى فى النص وهو يكتب رسالة على الكمبيوتر باستخدام أزرار الأرقام فقط ومفيش حروف.. ويعطى أمر التنفيذ بزرار قايمة ستارت مش بإنتر.كمبيوتر إرهابى بقى

3- سبب وجود الشرطة كل خمس دقائق فى النص

موسم ترقيات عقبال أملتك ولازم شغل – أخو خالد يوسف ظابط ولازم يخدم أخوه – عشان الشرطة بتراقب قسم البوليس اللى جنب أحداث النص

السؤال الخامس النحو

أعرب ما تحته خط.. لو مالقيتش القطعة أصلا ..اتصرف

ذهب الرئيس إلى المؤتمر .. ضع الجملة السابقة فى صيغة المثنى.. ماعدا الرئيس طبعا ياكلب

كان ممدوح إسماعيل قاتلا .. ضع إن مكان كان.. على ألا تنصب ممدوح.. عشان هوه بينصب لوحده


فُرِضت الضرائب علينا ببشاعة ..أعرب الجملة .. وارفع الضرائب أبوس إيدك

السؤال السادس الخط

كوز المحبة انخرم..طرطش على كمى..ياحبيبى بطل جفا وارحم عذاب امى


اكتب الجملة السابقة ثلاث مرات بثلاث خطوط.. موبينيل وفودافون واتصالات..كما يمكن التحويل

من خط لخط بنفس الرقم

هههههههههههههه

تعرف يابو محمود لو كانو جابولنا المتحان ده في الثانوية العامة كنا بقيا دكاترة دلوقتي

العفو حبيب خالو انتى عندى احسن من ميت دكتور ربنا يباركلى فيك واشوفك من احسن الناس خلقا وعلما وتقبل قبلاتى
خالك ابو محمود

ههههههههههههههههه ايه الامتحان الجامد ده انا حاولت احل فيه سؤال واحد ماعرفتيش وخاصة اخر سؤال .موضوع حلو اوى بجد ياطارق مافيش بقى امتحانات فى باقى المواد .

مرسيه نورا على مشاركتك الموضوع نور بوجودك
ربنا ما يحرمنش من مرورك
ترقبى دائما المواضيعى ان شاء الله تجدى كل جديد
ومرسيه مرة اخرى
جزاك الله خيرا

امتحان سهل جدا ياريت الامتحانات كلها تيجى كدة

ههههههههههههههههه

اهي دي الامتحانات ولا بلاش
مش الامتحانات بتاعتنا
شكرا ليك يا استاذ يا طارق

لو تعرف يا خالو لو الامتحان العسل ده
البسيط جه فى كل سنة فى الدراسة
كان زمانى الأول زى كل سنة فاتتة
ومعا زالك أمتحانك جميل ويريت نشوف
زية المرة القادة